Sea cauteloso! Promesanan politico no-realistico ta causa mas problema y dependencia a largo plaso

Mi mision ta pa introduci un solucion realistico, introduci gradualmente pa crea un cambio positivo y duradero. Nos ta scucha diferente promesa di otro partidonan cu porta ta zona bon, pero en realidad no ta asina. E promesanan aki a lo largo solamente ta bay sigui aumenta costo di bida, y sigui cu e ciclo di dependencia politico cu nan ta crea. 

E "middle class" di Aruba ya ta biba economicamente bou presion enorme y si sigui asina e clase medio lo bira clase pober. Ta hustamente cu e dolor aki di e pueblo e politiconan ta campañando y ta facil pa cay den trampa di promesa cu na prome bista ta parce bunita.

E promesa di aumento di salario minimo por ehempel ta uno cu lo subi costo di bida pa tur hende. Subiendo salario minimo lo pone un presion extra riba comerciante, y lo ahusta na e costo adicional aki door di subi prijs di producto y servicio. Pueblo mes lo carga e costo final y sufri e consecuencia. E costo adicional simplemente lo ser pasa pa e consumido y hustamente nan ta keda mas perhudica - y pio ainda esnan mes cu salario minimo nan poder di compra ta keda mescos of pio. 

Solucionnan

Pa personanan bou di belastingvrijevoet, mester amplia e reparatie toeslag. Baha loonbelasting lo yuda esnan den “middle class”, tambe ta un proposicion. Un sistema fiscal mas husto y simplifica tambe ta reduci e peso di 'compliance' pa comercio, y asina tambe yuda alivia e costo di haci negoshi cual ta afecta directamente e prijs di tur producto y servicio. Mester reduci prijs di gasolin door di reduci belasting riba gasolin, sea via acijns y/of BBO. E impacto lo ta directo riba e poder di compra door cu personanan lo tin menos gasto di combustibel - mas placa ta resta fin di luna. Pa comercio tambe e tin un efecto grandi pa reduci nan costo operacional, cual lo traduci den reduccion di prijs pa producto y servicio.

Otro formanan di ayudo directo pa famianan y esnan den necesidad. 

Mester enfoca riba duna sosten social mas directo posibel na esnan den necesidad. Un ehempel ta subsidio pa creche y amplia esun pa tra’i merdia. Tambe por introduci un "School Lunch Program" cu ta yuda e famia directamente na un balor mas o menos di 200,- pa luna pa cada mucha. Tambe por considera un sistema di supermercado social - cual por medio di subsidio di gobierno por ser ofreci na un margen di ganashi mas abou - pa esnan den necesidad (pensionado, bijstand, salario minimo e.o) haya acceso na alimento necesario na un prijs cu nan por paga. 

Futuro ta kere firmemente den introduccion di formanan alternativo pa logra subi e poder di compra. Un sistema balansa cu ta tene na cuenta e efecto negativo a largo plaso di e decisionnan aki, pa por mitiga nan. Mester segura solucionnan duradero cu menos impacto negativo riba nos poder di compra. “No tapa un buraco awe door di coba un otro pa mañan. Solucion sin perhudica e proximo generacion.” - Jeremy Erasmus.