Falta di un sistema di transporte publico adecuado ta un reto grandi pa hoben y adulto mayor

E falta di un sistema di transporte publico adecuado ta un obstaculo importante pa hobennan y adultonan mayor cu limitacionnan di mobilidad. Mobilidad ta esencial pa mantene independencia y pa yuda nos adultonan mayor sigui participa den nos comunidad y tin acceso na e servicionan basico cu nan mester. Pa hobennan, e ta nifica transporte pa scol, actividadnan extracurricular, y pa deporte.

P'esey, ami ta compromete pa implementa un transformacion significativo den e sistema di transporte publico na Aruba.

Un sistema di transporte publico accesibel y pagabel

Un di mi enfokenan principal ta pa logra cu transporte publico ta accesibel pa tur hende, specialmente pa adultonan mayor, hobennan bou 18 aña y studiantenan. Mi ta compromete pa crea oportunidad pa hobennan por bay deporte, actividadnan extracuricular y scol, eliminando limitacion di transporte y dependencia riba mayor. Un peso menos por ehempel pa mayornan cu ta traha dos trabou y no tin tempo pa hiba yiunan actividadnan. Aki ta elimina un barera pa hobennan atende nan deporte of actividad cu menos limitacion. E idea ta pa eventualmente haci transporte publico hopi barata y sin limite pa hobennan y nos grandinan.

Cobertura amplio di rutanan di bus y cooperacion strategico

Pa cu transporte publico ta realmente accesibel, mi ta propone pa restructura e rutanan di bus pa cubri 80% di e isla den maximo 10 minuut canando. Tambe mi ta propone un cooperacion entre Arubus y autobusnan, y otro empresanan priva di transporte, pa yuda amplia y diversifica e rutanan na luganan strategico cu actualmento no tin transporte publico. Nos no por forsa ni incentiva personanan pa haci mas uzo di transporte publico si esaki no ta accesibel. Esaki mester ta e prome paso.

Modernisacion di bushaltenan y accesibilidad mehora

Mi plan ta inclui modernisa e bushaltenan existente y crea nobo, den colaboracion cu sector priva. Esaki ta segura cu e puntonan di acceso ta sigur, comfortabel y adapta pa facilita e uzo di transporte publico hunto cu otro actividadnan recreacional, social, y tambe pa actividadnan economico cu por yuda "share the load" financiero pa e transformacion di transporte.

Seguridad social pa trahadonan den transporte publico

Tambe mi ta boga pa e importancia di seguridad social pa e trahadonan den transporte publico, incluyendo taxi y chauffeur di autobus, proponiendo proteccion integral cu por inclui seguro di bida, seguro di salud, y mas importante ainda, un plan di pensioen pa nan por retira dignamente. Esaki no solamente ta beneficia e empresarionan priva, sino tambe ta yuda pa tin un servicio di transporte mas stabiel y sigur pa e comunidad.

Cu e propuestan aki, ami ta reafirma mi compromiso pa construi un Aruba mas accesibel y inclusivo, caminda tur hende tin oportunidad pa participa activamente den comunidad y mehora su calidad di bida.